شعور سخيف.. بإنك تحس إن وطنك شئ ضعيف..صوتك ضعيف ،رأيك ضعيف
إنك تبيع جلبك وجسمك وإنك تبيع جلمك وإسمك ماجبوش حج الرغيف...
سألوا جحا عن سر ضحكوا...جالك أصل إتنين وشبكوا..إللي كل من تحت ميت..وإللي كل من فوج كفيف..
.ده شعور:سخيف
وشعور سخيف إنك تكون رمز الشحات...ة..تبني مبني للشحاتة..تعمل وزارة للشحاتة
ياساجية دوري عدي فوجي ودوسي....نصبوا علي وشحتوني فلوسي..
ربطوني فيك حتي ماتغميت...هما إللي فرحوا..وحدي أنا إللي إتغميت...
أنا إللي صاحب البيت..عايش بدون لازمة..ولما مرة شكيت..إدوني بالجزمة...
مش لاجي تطفح اديك؟ هاتولنا، وجيبولنا، إدونا، ودونا!!! حانجيب منين نديك؟... مش لاجي تطفح أديك....
طافح يابلدي غدايا ولوعتي غدايا...وأدي الأحبة إلتجوا وأتجمعوا عدايا...
أنا إللي زرعك دهب بتأكليني سباخ!!!... من كان ده تجل ودلع بزيادة دلعك باخ...
لاشفت فيك هنا ولا شفت فيك ترف...كل إللي فيك جرف..
كرامتنا متهانة ، واللجمة بإهانة.. بتخلفينا ليه؟ لما إنت كارهانا!!...
يعني أيه تبجي إنت هبة النيل يابوبا وكل يوم المية تجطع؟....
يعني إيه لما أشتكي غلو الفاتورة يجولوا تشكي.. بس تدفع؟...
لما جش الرز ثروة بتتحرج...
ولما نفط الأمة ثروة بتتسرج..
واما جلادك علي ولادك بيبطش..
واما علمك مايلجيش ياكل فيطفش...
يعني إيه نرفع إيدنا تحية لأجل الغزاة؟!!...
ويعني إيه لما أبجي ماشي في حالي أتشد إشتباه؟!!..
يعني إيه لما أتحبس أربع سنين حبس إحتياطي؟!!حبس إعتباطي..
يعني إيه مش حاسة بالعمر وغلاوته؟ّ..بتصبي مر العمر ليه؟ ده أنا كنت حاوهبلك حلاوته..
أنا عمري ماتأمرت..ولا حطيت شروطي..ومكان ماترسي مركبك بابني شطوطي
أنا كنت جيشك لما مماليكك باعوك...
وكنت يوسف لما عشتي سنين عجاف...
وضلوعي دي إللي في معركة قادش حموكي..
وشفايفي دي إللي مابطلتش في يوم هتاف...
أنا كل شبر في أرضك إتمرمغت فيه....
وكل يوم عشتيه انا إتعذبت به...
بتكرهيني عيونك السودة وأيامك إللي فاتت...
.مانتيش حبيبتي من النهاردة..حبيبتي ماتت....
مع صوت أدانك جرس في الشدة صاحيين لك..
.من إمتي كانوا الحرس هما إللي باجيين لك؟...
بعتيني علشانهم وعنيك معصوبة...ياهلتري خاينة ولا زي مغصوبة؟
.... كل الكلام إتجال...والشعر بجي ماسخ...
.والصبر علو جبال والظلم شئ راسخ...
وطن وغرجان في النطاعة...كل شئ ريحته نطاعة...
علمونا بالعصاية...ورضعونا الخوف رضاعة...
علمونا في المدارس يعني إيه كلمة قيام...قيام....
علمونا نخاف من الناظر فيتمنع الكلام.
.علمونا إزاي نخاف..وإزاي نكش بس نسيوا يعلمونا الإحترام..
.فماتزعلوش لما أبجي مش باسمع كلامكم...وماتزعلوش..
. مستني إيه من طفل ربوه بالزعاج...غير المشاكل والخناج.
. كل إللي بيجولك بحبك دول نفاج..انا لما جلت لك بحبك كان نفاج...
الحب يعني إتنين بيدوا... مش إيد بتبني وستميت تييت تييت يهدوا...
الحب حالة..الحب مش شعر وجوالة...
.الحب يعني براح في جلب العاشجين للمعشوجين....يعني الغلابة يناموا في الليل دفايانين...
الحب يعني جواب لكل المسجونين...هما ليه بجوا مسجونين؟...
يعني أعيش علشان هدف..علشان رسالة..
.يعني أحس بجيمتي فيك..إني مش عايش عوالة...
يعني لما أعرج تكافئيني بعدالة... الحب حالة...الحب مش شعر وجوالة.
. الحب حاجة ماتتوجدتش في وسط ناس بتجيب غداها من صناديج الزبالة... الحب جواكي......إستحــــــــــــــالةـ
الشاعر : هشام الجخ
ليست هناك تعليقات:
إرسال تعليق